contoh mesatua bali

KAMBING TAKUTIN MACAN

Inggih para panureksa kalih ida dane sane wangiang tityang. Sadurung tityang jagi ngawit masatwa tityang ngaturang pangenjali

“ OM SWASTYASTU ”

          Inggih para panureksa kalih ida dane sane wangiang tityang, mungguing satwa sane baktaang tityang tan wenten sios sane mamurda “KAMBING TAKUTIN MACAN’. Sane mangkin jagi kawitin tityang.

          Nah timpal – timpal tiange pada ajak makejang. Mai paek – paekang negak apang tatas dingeh satuane.  banding gradag – grudug di jalane sing karuan unduk, paling melah jani mesatua, satuane kene

          Dugas aab gumine enu kentel, kesatuaang ada kambing memene madan Ni Mesaba lan panakne madaN Ni Wingsali. Ne jani  Ni Mesaba luas ke alase ngalih amah ngajak panakne Ni Wingsali. Sawireh Ni Wingsali nu cerik lantas ia kejag di duri tur ngaukin memenne kene abetne “ embek…, embek…, embek” nawang artine?. Artinne kene antiang tiang me, antiang tiang me. Lantas antiange teken memenne.

          Keceritayang mangkin Ni Mesaba ngajak panakne sube neked di alase. Mimih Dewa Ratu legane Ni Wingsali nepukin padang ne samah – samah , don- donan ne lom – lom. Jeg sing ingitungang apa ngamah kanti betekan. Sawireh suba betek NI Mesaba ajak panakne medem di beten kayu pulene ne gede, ne ada di samping sembere. Disubane I Kambing medem saget teka Macan Lantas ngereng kene  “ Beh beburon apa ye ento, metanduk nyap – nyap, mejenggot lantang” keto abetne I Macan. Nah sawireh suba makelo medem I Kambing lantas ngedebras bangun. Dapetange ada Macan di arepane. Beh I Macan lantas ngeraos kene “ Eh.. cai beburon apa cai alih mai, cai tusing nawang nyen raja di alase ene, ne ne I Macan “. Lantas sautine teken I Kambing kene Abetne “ Eh cai Macan ne - ne iwasin tanduk kaine nyen kaden malinggih ditu Ida Batara Siwa “. Lantas I Kambig ngaplugang tandukne di batune plug, plug, byur pesu api. Bin cepok kaplugange tandukne di tanahe plug, plug  bin pesu api. Nah ne I Macan jejeh jeg malaib sing ingitungang apa., kanti nelungdasa lima angkiane. Nah ne jani I Macan matepuk ajak I Bojog laut nyatuayang unduke ne tepukine I tunyan kene abetne “ Eh cai Bojog  tunyan kai nepukin beburon matanduk nyap – nyap, majenggot lantang, jeg mara kaplugange tandukne pesu api, ento ne ngranaang icang takut”. Lantas sautine teken I Bojog kene abetne “ Beeeeh ento tusing je lenan teken I Kambing. Ne jani paling melah jalan alih I Kambing di tongose ane tunyan. Sawireh icang sing je kuat melaib nejani jalan tegul ikuh iragane apang icang tusing kecag”. Disubane suud negul ikuhne, lantas I Bojog ajak IMacan mejalan ngalih tongosne I Kambing. Nah keceritayang jani I Bojog ajak I Macan suba neked di arepane I Kambing. Konden maan ngeraos apa – apa saget maluine teken I Kambing kene abetne “ Nah ne koya I Bojog ngujang mara jani ngenah Ipidan – ipidan cai nyanggupang ben mecan pat-  pat, ne jani mara aukud nah - nah kekanggoang icang. Eh cai Macan ne ne iwasin bibih kaine bek misi getih suud ngamah nyaman caine ento – entu ditu di sembere kakutang icang  tenggekne “ . Lantas delokine teken I Macan beh seken ada tenggek Macan , mara keto jeg Macan ngedebras malaib kuting I bojog paide. Sujatinnete ne Macan nak beburon belog, lawatne pedidine takutine. Nah ne I Kambing bibihne barak cara misi getih sawireh suud ngamah don gendola. Nah ne tinggalin I Macan melaib dui, ket- ket jeg ingsake kanti getihne pesu paketel – tel.Sing tawange di malune ada paluh dalem jeg makecos plug plug kanti makutun lambang. Tawang artinne ..? Artinne ngesek – sek. Disubane I macan ajak I bojog mati saget uling dija kaden teka guake ngaba kuud. Satua bawak suba suud.

         

          Nah timpal – timpal tiange pada ajak makejang nejani jalan duduk semertin satuane Itunyan

1.     Iraga tusing dadi nguluk – nguluk timpal buka solahne I Bojog

2.     Iraga tusing dadi rengka ngajak timpal buka solahne I Macan

3.     Iraga patut matimpal saling asah asih lan asuh

4.     Iraga dadi nguluk – nguluk nenging ngajak musuh buka solahne I Kambing, punika sinalih tunggil pepalihan Panca Nreta.

Sawireh ene suba teduh me kema malu mulih ajak makejang tulungin I Bapa, I Meme apang tusing welange buin pidan bin jumunin masatua ane melahan.

Ingih para panureksa kalih ida dane sane wangiang tityang akadi punuka satua sane mersidayang aturang tityang. Yening wenten pabaos – pabaos tityange sane nenten manut ring sejeroning manah ida dane  sinamian tityang nunas geng rena pengampura. Maka pinguntat tityang sineb antuk parama snthi

“ OM SANTHI SANTHI SANTHI OM “

by : bokir antrak